الثلاثاء، 28 سبتمبر، 2010

انك تعيش في دولة ... مايعة

مبدئيا اقصد من مايعة انها مش راسية على حل
لا هي دولة اشتراكية ولا رأسمالية
تدعي نظام ديمقراطي لا تعيشة
تسالم اسرائيل و تعاديها وترفض التطيبع
تصدق على ان التعليم هو الحل ولا تلتفت اليه
تدعي حرية الرأي للجميع وتملك الفتك بهم بالقوانين
تمسك سيفا على رقبة كل منا اسمه قانون الطوارئ
قد لا تستغله لكن هذا لا ينفي وجودة او امكانية استغلاله
تشهد اشتعال الاحتقان الطائفي و لا تحرك ساكنا
ليس من اجل مصر
ولكن من اجل النظام

نظام متردد وضعيف الشخصية
بجد اي نظام تاني هيبقى ارحم
مجرد التغيير

وشايفه عالنظام مش عم يمشي غيرله النظام



الاثنين، 20 سبتمبر، 2010

بطرمان





بطرمان

أنا فيه لوحدي
صغير على قدي
على سؤال معرفوش
ألاقي فيه ردي
لو حتى متسألتوش
من حد مقابلتوش
في يوم من الزمان

بطرمان

مصنوع من ازاز
أحدث طراز
مسموحلك تبص
بلا اشمئزاز
ولا استفزاز
مسموحلك تبص
بدون ما تمسك ميزان*


بطرمان

اشوف العالم فيه
بدون ما احتك بيه
ولا أعمل فيها بطل
واترمي عليه
وتخاف من أيه ؟
لو سألوك وحصل
قولهم انا جبان



بطرمان

بين اربع حيطان
من غير ودان
ميتمسكش
مش زي الفنجان
يمسه كل ساعة لسان
مينشفش
مهما كان


بطرمان

مفيش منه حاجة مدلدلة
لا صليب في سلسلة
ولا آية كرسي
مفيهوش أسئلة
متحرمة دي ولا متحللة؟
أو دعاء ركوب في تاكسي
لما تفتح الببان


بطرمان

خده ليك دار
خبي فيه المرار
او حتى خده شعار
ولو منفعشي
ابقى تف في وشي
او عالبطرمان

ــــــــــــــــــ
* متمسكش ميزان : متحاكمنيش يعني

لينك الصورة

السبت، 18 سبتمبر، 2010

مشاهدات

خرجت اليوم من النفق اتقاء جنون سائقي سيارات الكورنيش السكندري
وقد اجاد احد السكان وضع خرطوم تكييفه مباشرة فوق مخرج النفق
ومعدل سقوط المياه شديد السرعة
لم استطع الهرب واستقبلت على رأسي بعض القطرات
رفعت عيني الى مصدر النقاط
اصطدم بصري بعمارة شوهتها الرطوبة

امس الاول كنت في احدى قرى الساحل الهادئة
الارض متدرجة من الطريق الى البحر - بقصد او بدون - بحيث يصبح البحر هو الاقل منسوبا
كنا في احد الشاليهات المرتفعة نتسامر متنسمين نسيم البحر المتوسط
عندما فتح الله على احدهم " احنا جنب سور القرية وقاعدين على البحر ، لو اسكندرية كانت كدة زمان كانت بقت فعلا تحفة ،ليه بلدنا متبقاش كده؟"
أتاه الرد :" طب وليه دي متبقاش بلدنا !"

دمنهور صارت فيها مناطق كاملة- وبخاصة القديمة منها - لها لون واحد وطرازها متقارب
لماذا لا تقوم الدولة اذن بتوحيد الوان وطرز (تصميمات ثابتة ) للبلوكات السكنية
بتطبيق نظام صارم يبدأ من تعليم الناس لثقافة الجمال ومراعاة مرتبات الموظفين واتقاء الرشوة
وسيكون لديكم بعد 50 عاما مدينة شديدة الجمال بلا تكاليف مفزعة

مشروع ابني بيتك في برج العرب سيشب مسخا عشوائيا عظيما وعارا على الدولة
كلٌ يبني بمخيلته

ثبتوا الطرز تجدوا شيئا لائقا
ابحثوا عن الجمال المفقود حتى يعود يوما

السبت، 4 سبتمبر، 2010

العيد داخل ..... يا رجالة



العيد وما ادراك ما العيد
وقد منحوه تاريخا من التحرش
صار كرنفالا حيوانيا للمتحرشين
وخاصة عيد الفطر الذي يأتي بعدما يكبتون انفسهم في رمضان
بعدما ظهر الخليط الغريب بين المتطرفين الدينيين والاباحيين
وآخر موضة الآن ان المرأة لابد ان تحتشم بمنزلها
عشان لما يشوفها جيرانها من الشباك لا يستثاروا
قالها واحد اجاد اختيار اسمه في بلوج كونتيكي

ومن هنا احب ادعو كل متحرش انه يمسك نفسة حبتين
وأؤكد ان الطبيعي ان البنات تبقى حلوة من غير ما حد يتعرض لهم
ولو اتعرضت ليهم انت اللي تبقى قليل الادب ولازم المجتمع يؤدبك
مش يخليها وحشة ويداري جمالها وريحتها تبقى عرق وانت تبرطع براحتك
احترموا آدميتكم
وعلى فكرة انت كده بتعصى ربنا اكتر منها ده لو قلنا انها بتعصاه اصلا

مش هقولك لازم تحط عينك في الارض ده برضه يبقى غريب عن الطبيعة
اكيد الحلوة بتخطف عيني بس لحظات والموضوع بيخلص
انا مثلا عمري ما شفت وحدة حلوة واحد قطفلها وردة وأثنى على جمالها
ومشي فورا قبل ما دماغها تودي وتجيب
اصل الجو العام دلوقتي شديد القذارة واسهل حاجة
انك تعمل نفسك بتاع ربنا وترمي على غيرك

وده مشهد التحرش في فيلم كايرو تايم
ابشروا وصل تحرشكم هوليوود
الله يكون في عونكم يا بنات ده انا بجد خفت



وده لينك الصورة