الاثنين، 20 سبتمبر، 2010

بطرمان





بطرمان

أنا فيه لوحدي
صغير على قدي
على سؤال معرفوش
ألاقي فيه ردي
لو حتى متسألتوش
من حد مقابلتوش
في يوم من الزمان

بطرمان

مصنوع من ازاز
أحدث طراز
مسموحلك تبص
بلا اشمئزاز
ولا استفزاز
مسموحلك تبص
بدون ما تمسك ميزان*


بطرمان

اشوف العالم فيه
بدون ما احتك بيه
ولا أعمل فيها بطل
واترمي عليه
وتخاف من أيه ؟
لو سألوك وحصل
قولهم انا جبان



بطرمان

بين اربع حيطان
من غير ودان
ميتمسكش
مش زي الفنجان
يمسه كل ساعة لسان
مينشفش
مهما كان


بطرمان

مفيش منه حاجة مدلدلة
لا صليب في سلسلة
ولا آية كرسي
مفيهوش أسئلة
متحرمة دي ولا متحللة؟
أو دعاء ركوب في تاكسي
لما تفتح الببان


بطرمان

خده ليك دار
خبي فيه المرار
او حتى خده شعار
ولو منفعشي
ابقى تف في وشي
او عالبطرمان

ــــــــــــــــــ
* متمسكش ميزان : متحاكمنيش يعني

لينك الصورة

هناك 3 تعليقات:

Kontiki يقول...

:) هو دة اللى بيقولوا علية شعر عامى ؟ اصل انا ماليش فى الشعر قوى عموما مسموحلك تبص
بدون ما تمسك ميزان
للاسف كلة ماسك لكلة ميزان وكرباج كمان :(

Andrew يقول...

شعر حر وعامي ... على قد ما انا فاهم
اهو كلام مسجوع وخلاص
ولا انا لي في فن التصوير واللوحات :)

Kontiki يقول...

اهىء :(
كدا ؟!