الثلاثاء، 29 ديسمبر 2009

أنا .... أنت

انا مكتوب في بطاقتي اللي زي بطاقتك مصري مسيحي
انا مش اهل كتاب
ولا اخوة مسيحيين
تتعامل معايا على اننا شركاء في الوطن
يعني مش زي ما بيقول الدين ولا المتحدثين باسمه
انا ممكن اسيب ديني بس مش ممكن اهرب من انتمائي لوطني
انا وانت اللي متداس علينا بالجزم
بنتعارك والمية بتغرق مركبنا
اوعى تفتكر ان لو المصريين بقوا كلهم مذهب واحد- ولو ان ده شبه مستحيل- ان هيبقى فيه سلام
المشكلة اننا معندناش مشروع قومي نقف حواليه
والعيشة الضنك خلت فيه طاقة عند الناس عايزة تخرج
و كل مجموعة دينية عندهم اجندة وبينفذوها
شعارها شعللها شعللها
اوعى حد بدقن يسوق دماغك ولمؤاخذة يركبك
خلي دماغك فيها فلتر مش "لا تناقش ولا تجادل يا علي"
واقرا التاريخ وشوف المهازل
وافتكر انا.... انت

السبت، 26 ديسمبر 2009

عن الكبائر في مجتمعنا

بوصفنا كلنا بشر خطائون ليس بيننا معصومون من الخطأ من السعودية للفاتيكان وكلنا على ذلك متفقون
وأنا من المعتقدين بتساوي جميع الخطايا فهي ليست بدرجات متفاوتة
لكن طبيعة المجتمعات تجعل بعض الخطايا فيها اكثر شيوعا من البعض الآخر
ومهمة البشر فيها اسهل لتنويم ضميرهم بفرض انهم مؤمنون

ظهر الاسلام ليقضي على اكثر ثلاث خطايا او افات مجتمعية كانت شائعة في شبه الجزيرة العربية في ذلك الوقت وهي الخمر والميسر وتجارة الرقيق
فاكتسب من يرتكب تلك الخطايا بعد ذلك سوء سمعة بالاضافة الى الزنا باعتبار المجتمع الاسلامي في الاساس بدوي والمجتمع المصري مسيحي يعتبر النظرة الشهوانية للمرأة من الزنا
وفي مقابل ذلك تنتشر في مجتمعنا خطايا اخرى عديدة ارتكابها اكثر بساطة مثل الرشوة والاختلاس والغش وخلافه
بعكس العالم الغربي التي تعتبر الخطايا الاخيرة كبائره والاولى صغائره
وياللسخرية لما اسمع واحد بيقولى " الراجل ده استغفر الله العظيم بيروح شارع الهرم بيشرب خمرة ويلعب قمار" وهو بيحط حتة حشيش في الجوزة.

الثلاثاء، 22 ديسمبر 2009

اهو دا اللي صار وادي اللي كان

أحيانا بفكر ان حتى اسمي ضد افكاري
فكرة الاتجاه الى الانتماء للوطن قبل الدين
كان هيجرى ايه لو كانوا سموني اسم تاني غير اندرو
هبقى مسيحي درجة تانية مثلا
الاسم اللي حسسني بالعنصرية من معاملات الناس سواء تمييز بالسلب او الايجاب
طب وكمان ليه ما سمونيش اندراوس الاسم العربي
ولا هي تماحيك فارغة في الغرب

اهو دا اللي صار ، احنا ولاد انهاردة
يوم ما تبقى مصر علمانية يتقال مصر مصرية مش اسلامية ومش اصلها مسيحية والكلام اللي هيودي في داهية ده
يوم ما اشوفش المصريين يتكلموا على اساس الدين
والنكتة الكبيرة انهم بيواجهوا بعض بالمنطق ، والايمان بالدين اصلا خلاف للمنطق
اليوم ده اللي اتمنى اشوفه بسرعة
هروح اغير اسمي

الأربعاء، 9 ديسمبر 2009

سؤال ممكن تشوفه اهبل

ليه كل المصريين اللي بيتكلموا في الجزيرة لسانهم بيتقلب وينطقوا الجيم (j) مش زي ما احنا بننطقها (g)

الثلاثاء، 8 ديسمبر 2009

جهاز الصرف الصحي يعترف بإلقاء‮ ‬400‮ ‬ألف متر مكعب مياه صرف بالنيل يوميا

العنوان المستفز للغاية عاليه منقول عن مجلة روز اليوسف في عدد الاربعاء 9 ديسمبر 2009
كيف لك ان تعترض وتثور لوصول انباء عن التعاون بين دول حوض النيل واسرائيل وانت تحتقر النيل لذاك الحد

ليس هذا المقصود مما اكتبه بل لأني فجأة تذكرت الشيطان
هذا النظام بكل حكوماته يتصرف مع ذاك الشعب كالشيطان عند اغواء البشر
فهو يعطيك باليمنى ثم ينتزع باليسرى ما هو اغلى

تابعوا السيناريو
1) ازمة صرف في احدى الاماكن
2) الحكومة تعد بحل الازمة وتقوم ببناء شبكة صرف
3) تصرف في الترعة التي يشرب منها هؤلاء الناس الصرف دون معالجة
4) يمرض الناس بأمراض الدنيا والآخرة ويصرخون منادين بعلاجهم
5) بأقل الاعتمادات تبنى مستشفى عمادها الاهمال يعمل من فيها في اسوأ الظروف
6) الناس تموت من الاهمال او عدم جودة تأهيل الاطباء لضخامة الاعداد
فالحكومة لم تمنع الطالب من دراسة الطب ولا هي اتاحت له تعليما جيدا

وقس على ذلك ... اليس من يفعل ذاك شيطانا؟؟!!
نتحرك بقى قبل ما الموضوع يبوظ اكتر

الاثنين، 30 نوفمبر 2009

مجتمع بوشين

قال كارل مركس ان الدين افيون الشعوب ومعاه حق في وجهة نظره
وقال كتير الملحدين ان الدين ده للضعفاء عشان يغطوا بيه على ضعفهم وقلة حيلتهم
ومعاهم حق برضه ، تخيل نفسك مش بتقول يا رب
وخصوصا مع الظن السخيف لكل دين او جماعة ان ربنا بتاعهم هم بس
وبنشوفه بوضوح في دعوات المشايخ في جوامعنا "اللهم اذلهم واعز المسلمين ...الخ"
وفي الانجيل برضه واضح من كلام شعب اسرائيل على اعدا
ئهم
المناجاه نفسها كويسة جدا وبتريح جدا وبنعترف فيها بضعفنا فعلا وبنخرج منها احسن
بس مش معنى الكلام ده اننا نشمت وندعي على الناس ونقول زي ما قال المغيبين بسبب الشيوخ

يارب مش الناس دي كفرة امال عايشين احسن مننا ليه
والشيوخ نفسهم مغيبين من جهلهم بالدنيا ومن لمة الناس حواليهم
يرد عليهم الشيخ ابن تيمية : "ان الله ينصر الامه العادلة وان كانت كافرة على الامه الظالمة وان كانت مسلمة"
بس ربنا في فرضية وجوده بيدي كل واحد فعلا حقه ولازم نفهم كده
الحل مش زي ما غنى جون لينون(john lennon) اننا نلغي كل الانتماءات الدينية والقومية في اغنية(imagine)

واحنا فين من الكلام ده كله
مجتمعنا بكل سذاجة كلة ماشي ورا الكلام ده
والناس السذج المغيبين رهنت تقدمنا بالنسبة بين اعداد مصلي الفجر والجمعة
لحد ما بقينا بنقفل كل الشوارع عشان نصلي فيها
وفي المقابل بنتخانق و بنقتل و بنحرش وبناخد رشاوي
بنكدب وبنقول احنا ناس محترمة
وبنقول البنات غلطانة هم اللي لابسين كذا وكذا وبنرمي ضعفنا وعجزنا عليهم
وزي ما احنا مقهورين بنطلع القهر عليهم
عارفين كل الشواهد التاريخية بتقول الحالة اللي احنا فيها دي حلها ايه؟؟

الثورة على الدين وانتزاع الحرية الجنسية
بمعنى ان واحد يطلع يقول" انا طالبة معايا اروح جهنم انت مال امك" ؟
ويقول انا ابيح بقى وطالبة معايا اعيش انا والبنت اللي بحبها في الحرام وهي راضية
واللي ليك عندي لو جبت عيال هاربيهم واكتبهم باسمي ويفضل في المحاكم لحد ما ينتزع حقه
ويبقى الوضع ان اللي عايز يبقى كويس ماشي واللي مش كويس ماشي
ونبقى ساعتها حققنا القول العبقري للسيد المسيح لما قال للناس اللي كانت معترضة علية انه قبل توبة امرأة زانية
"من منكم بلا خطية فليرمها بحجر"

ساعتها الراجل ده هيشوف انتخابات مزورة هيكسر ويشتم ويتف
فكركم العالم المتحضر ده مافيهوش اللي بيسموه هنا همجية
فرنسا نفسها هاجت على شارل ديجول وقالت انه بيخالف مبادئ الثورة الفرنسية
ولو ساركوزي عمل حاجة كدة ولا كدة هيطلعوا عليه زي ما طلعوا اجدادهم على لويس السادس عشر ودمروا الباستيل

اول لما يبقى عندنا كل واحد عارف هو عايز ايه وعنده الشجاعة انه يقول اللي هو عايزة ويعملة
ومش هيبتدي الا بالحرية الجنسية
ونختم بقول بهيباتيا رمز القمع على اساس ديني للمرأة والعلم من المتطرفين المسيحيين في القرن الرابع
"لك الحق في ان تكون مخطئا"

الأربعاء، 25 نوفمبر 2009

Hamza El Din



حمزة علاء الدين فنان مصري نوبي عظيم ، كتبت اسمه بالانجليزي لأنها اللغة الاشهر التي يعرف اسمه بها .
حمزه الدين نوبي تم تهجيره من قريتة في توشكي لبناء سد اسوان .
حمزه الدين كان مهندس كهرباء "مؤهل عالي"
حمزه الدين يعد أول من ادخل العود في الموسيقى النوبية التي تعتمد على الايقاع الخماسي كسائر انواع الموسيقى الافريقية
حمزة الدين عاد بعد دراسته للموسيقى في القاهرة وايطاليا و امريكا الى النوبة ليسعى خلالها على حمار يجمع به التراث النوبي الغني فهو من حمى التراث النوبي من الاندثار
حمزة الدين عمل في التدريس في الجامعات الامريكية واليابانية
حمزة الدين اصدر 13 البوم من الموسيقى النوبية الساحرة
حمزة الدين لقى وجه ربه سنة 2006 ونعتة امريكا و اليابان
حمزة الدين لم يخلع عنه جلبابة النوبي ناصع البياض

الموقع الرسمي بتاعه اهه
http://www.hamzaeldin.com

لو اتكلمت عن بلدك وثقافتها بحب وفخر للناس هتخلي عنيهم تشوف بس حاجات جميلة عنها ويزيد احترامهم ليك
بس قبل كده لازم تحترم انت تراثك وثقافتك وتسيب الوان الاجانب وتحارب عشان توصل لونك انت ونكهتك انت في كل شئ
ايوه لازم يبقى لينا نكهتنا في كل شئ حتى الدين واللبس وخلافه تميزنا عن باقى البلاد
وقت ما نعتز بكل حاجة خارجة من طين البلد دي هنبقى اقوى
ومش هننضرب تاني في السودان
والناس بره بيحبوا الموسيقى بتاعتنا حتى اتفرج على الفيديو
الفيديو ده اهداء لمحبي الفلامنكو ممن انكروا الفن المصري
ده فيه الشيخ احمد التوني مع عازف الجيتار الاسباني(Tomatito) من فيلم(vengo)




الثلاثاء، 24 نوفمبر 2009

كرامة

لو مخدناش حقنا من اللي حصل في السودان يبقى احنا فعلا مبقاش لينا كرامة
وساعتها يبقى كل شئ فشل ونحاكم كل مسئول
لو مجبتولناش حقنا من الجزائريين حنروح احنا ناخده من المسئولين
انشاله تبقى ثورة

وساعتها نعرف بجد ان احنا بقينا ضعفا جدا
لازم نعمل مشروع قومي لنهضة بلدنا بينا ومننا احنا الشعب
اسبانيا بعد مشاكل الحرب الاهلية وحكم فرانكو كل الناس اتفقت انها تنهض بيها
حتى الشغالات الاسبان الي كانوا في اوربا كلها رجعوا يشاركوا في بناء الدولة

يا ريس حتى لو كنت انت فعلا الاكفأ في وسط كل الموجودين
التغيير بيدي امل في النفوس
وجيفارا وكاستروا نفسهم في كوبا مقدروش يقنعوا الناس يؤمنوا بالثورة كتير
كفروا بيها مع اول احساس بالفقر وبيموتوا غرقى في البحر وهما بيحاولوا يروحوا امريكا

كل حاجة فاتحة على بعضها ولو معرفناش نرد كرامتنا يبقى منستحقهاش اصلا

"كل شعب ينال الحكومة التي يستحقها" تشرشل

الجمعة، 23 أكتوبر 2009

احساس سخيف

عندما يتسائل بعض مسلمي مصر "هو المسيحيين عايزين ايه ؟
هما مش مكفيهم انهم .. وانهم .....؟
ازاي يتساووا مع الاغلبية المسلمة؟

انا كنت في حفلة كانت في فرقة بتعرض اغاني البيتلز ، واللي يعرفهم ليهم اغنية اسمها "let it be"
بتقول "عندما اجد نفسي في وقت الضيق تأتيني السيدة العذراء قائلة ايات الحكمة لي.... فليكن ...الخ."
وقف الشاب اللي كان بيغني قال للناس "تحبوا نغني let it be "
البعض كان عادي وفي ناس كانت مستهجنة

انا مش قصدي حاجة ولا انتقد حد ولا اعدل على حد
بس كل اللي عايز اقوله
اعذرونا .....احساس انك اقلية ده سخيف جدا جدا
والحمد لله معظم الناس في مصر مبحسش معاهم بكده

الأربعاء، 7 أكتوبر 2009

نقاب

انا لي نقط على النقاب اجتماعيا وليس شرعيا لأني ببساطة بعترف بشرع المجتمع قبل شرع الدين لأن المجتمع مش كله مسلمين ولو وصلنا لصيغة اجتماعية ناجحة مفيش داعي لتجارب تانية
.لو واحد قليل الادب اتعرض لبنت حلوة الحل ان نأدب الولد ولا نخلي الحلوة وحشة

.انا لما واحدة منقبة تيجي قريب مني بحس انها بتحتقرني وبتقوللي بص انا عاملة في نفسي ايةعشان انت حيوان مش هتقدر تمسك نفسك

.معاملة الست انها بونبوناية تفضل متغلفة لحد ما تاكلها ولو مكشوفة تلم دبان دي نظرة عنصرية
.كشف النقاب لتحديد الهوية واجب من الفرد تجاه المجتمع
.اللي خلى في تحرشات الفرق الكبير بين المنقبة واللي لابسة سواريه واعمل حسابك ان المجتمع مش كله مسلمين وده معناه ان لو زادت المنقبات هيظلموا بقيت البنات ان التحرشات هتزيد

.السلفيين بيبثوا فكر مفاده ان الست اللي كاشفة شعرها عاصية وده معناه انها لو نازلة الشارع حلوة تبقى عايزة تتعاكس وده الفكر اللي مالي دماغ كتير من المتحرشين

.الوجه ده البطاقة الشخصية الطبيعية اللي عاملهلنا ربنا عشان نعرف بيها بعض ونتعامل مع بعض ونشوف رد فعل .. ضحكة وتكشيرة
الوش اللي لو فيه حاجة مش باينة متفهموش
.حافظوا على شخصيتكوا وشخصية بلدكوا في لبسكوا.. في نكهتكوا وبرضوا افضلوا محترمين ومحتشمين

.الاسلام اما ظهر حسن كتير حالة المرأة ... انتوا بتعملوا ايه
.لو الموضوع حرية شخصية يبقى انا من حقي امشي في الشارع ملثم وماسك سكينة .. حرية

.اما الشيخ العدوي يقول "الامن يمنع العفيفات المنقبات ويترك البغايا" ده سب علني لكل اللي مش بيسمعوا كلامه و اسمها برضه قلة ادب

.قتل المسيحيين المتشددين هيباتيا العالمة الوثنية بدافع الدين وده كان اخر ذكر العلماء في الاسكندرية القديمة وقعدت مصر متلطمة بعديها

.ربنا لما يهتم قوي كده بالمظهر مين يهتم بالجوهر؟!

.اختم ببيت المازني
عزوفا عن الدنيا ومن لم يجد
فيها مرادا لآمال تعلل بالزهد

الأربعاء، 16 سبتمبر 2009

subliminal messages

رسائل تخاطب اللا وعي لدى الانسان

قد لا تشعر بها لكنها تؤثر على سلوكك وعقلك فيما بعد

فهي تقع بين السطور

ما شعورك لو شاهدت شئ بشكل جديد ، بعد ان شاهدته عشرات المرات قبلا

ما شعورك اذا ادركت انك بالفعل تأثرت بذاك الشئ

ما مدى ضيقك لدى شعورك بالخداع

كم آلمني دناءة هذا الفعل

كيف سارت الحياة لتلك المنعطفات

وثق انها ليست صدفة

واحذر الفيديو للاسف يحتوي على محتوى للكبار فقط

لكنه ليس للاثارة هو فقط

لكشف خبث المستور

اتفرج


الجمعة، 14 أغسطس 2009

ايها المقاطع المسلم .......... خد دي



الاسواق المصرية غرقانة عصير برتقال اسمه صن توب
صن توب ده يا اولاد صناعة سعودية
وطبعا كلنا عارفين مكانة السعودية عند كل المسلمين وبنحترمها
زي بالظبط ما احنا عارفين انحطاط صورة الدنمارك في عيون المسلمين وبنحترمها برضه
عشان اللي بيحصل في الدنمارك ده مش مجرد حرية رأي ده استفزاز
فبنحتــــــــــــــــــرم المقاطعة
لكن اما يبقى صن توب ده صناعة سعودية لمنتج دانماركي بتصريح من الدنمارك يبقى ايــــــــــه؟
يبقى الموضوع مش مقاطعة بقى الموضوع بيزنس و صراع بين المنتجات والمصنعين
وساعتها احنا لمؤاخذة نبقى ................ متساقين .

الخميس، 6 أغسطس 2009

الخداع بين السلفيين و الاباحيين

لفت نظري بشدة الموضوع ده لما ابتديت اقرا الكتيبات الصغيرة المزخرفة بأسماء شيوخ ودكاترة السلفية ومش لوحدي او من نفسي لكن التاكسي هو اللي عرض على الكتيب ده لما لقاني محتاج للهداية!!.
وضاع ذهولي من سذاجة الراجل لما قريت بنفسي سذاجة اللي مكتوب ومستعد ابصم بالعشرة ان الكلام ده كله خيال.
يعني واحد فاسد تروح تقوله كلمتين يتوب و يطلق لحيتة ويشع من وجهه نور الايمان بتعبير الكتاب.
الكلام ده بيشجع على صدام قوي زي اللي حصل اول يوم عندي في الكلية اما كان في طلبة ملتحين بيحاولوا يقنعونا ان مفيش بنات يقعدوا جنب ولاد ونبتدي السنة برضا ربنا علينا.
انا بكره اساليب النصح من على المنبر ، وديماجوجية اصحاب السلطة الإلهية الممنوحه لهم من الله .
ما اهو انا برضه من حقي ابقى عاصي او حتى ملحد مفيش حد يمشيني بالعافية او يكون ليه سلطة عليا - شيخ كان او ابونا -دي حياتي ولازم تمشي زي ما انا عايز.
خلينا في موضوعنا .. المهم الناس دي بتعتبر خداع الناس ضرورات تبيح المحظورات وأشهر انواعه اختلاق القصص والتصديق على صحة حدوثها.
وزي قصة كوكاكولا لو قلبتها و اريال لو شلت منها وحطيت فيها والكلام العبيط ده كله ، وأصلا معظم الشركات الأمريكية ظهرت من قبل ما الامريكان يعرفوا بحاجة اسمها الاسلام او ده بيقول ايه ........ ودي على لسان واحد امريكاني اسلم مؤخرا.
والخطيئة الكبرى اللي بيرتكبوها هي اقناع الناس ان البنت اللي لابسه عريان شوية او مش محجبة او دلوقتي بيقولك الوان ملفتة عايزة تتعاكس في الشارع.
والاخطر ان المواقع الاباحية العربية نقلت كدة واقنعت الشباب الصغير ان النوع دة من البنات عايزين يتمسكوا ويتعمل فيهم ويتعمل........
ومألفين قصص على لسان البنات بخيال جامح استحالة يحصل في الحقيقة لحد ما بقى في ناس عندهم قناعة كاملة بكدة.
وده يفسر شئ من التبجح الكبير اللي عند الشباب الصغير المراهق اللي المفروض يبقى عنده نسبة خجل.
مش اي حد يتسمع له يا نااااس .
وانا كمان مخنوق من المحامي اللي سخن الناس في برنامج الحقيقة بتاع السوسة وائل الابراشي، قاموا حرقوا بيوت البهائيين.
لازم نتعلم ان مش اي واحد يتسمع له ومش اي واحد يقول ايتين يتقاله امين ............ احترموا عقولكم.

الاثنين، 13 يوليو 2009

PAPA - PAUL ANKA

اقوى اغنية ممكن تسمعها عن الاب ، انا اول مرة سمعتها نمت مبهدل نفسي من العياط .
انا لقيت بابا مرة قايم مدمع من على الكومبيوتر فجيت ابص في ايه على الكومبيوتر لقيت الاغنية دي شغالة ، واما سمعتها مقدرتش امسك نفسي انا كمان .

الأربعاء، 1 يوليو 2009

كونوا مصريين ....... محدش هينفعكوا

اليومين دول تيجي تتمشى في الشارع في مصر تشوف وشوش مصرية خالصة تطل عليك من تحت شادور ايراني او نقاب بدوي خليجي او جلابية باكستاني فوق دقن طويلة ومعارضيهم كفار مقدما.

او احيانا تكون الوشوش تحت شعر اشقر وجواها عيون زجاجية زرقاء زائفة ، جسد عليه كل الماركات الامريكية بنطلونة كاشف ما يجب ان يستره ودول بقى معارضيهم جهلة وناس بيئة.

النوع التالت المصريين الاصليين اللي بيلبسوا جلابية من غير يائة وتحتها صديري ودول اهل الحضر بيعتبروهم عار رغم ان جدودهم من النوع دة واصبحوا فئة ممكن تستعر منها وبقت فلاحين دي شتيمة والقاهرة تشنج جسدها من كتر البشر وتكاد تلفظهم
واللي بيعزّلوا الحضر اول يوم نقلوا فيه القاهرة بقوا بيسموا مكانهم الاولاني حتة بيئة ... والحقيقة البلد صناعة البشر مش العكس .

توفيق الحكيم فسر ظاهرة سوء حالة الريف المصري لأختفاء السيدة او الليدي (lady ) اللي بتهتم بالفقراء وعلى الاقل تعلمهم النظافة لكن احنا كان عندنا الهانم ده وسيلة تتانك بيها على الفقراء وتسخرهم ...... تراكوة بقي .

أنا مش ضد الحرية الشخصية في النهاية كل واحد بيعمل اللي هوة عايزة بس اللي انا اقصدة ان اعتزازك بثقافة بلدك ضروري ولما تفقد انتمائك للبلد وتتركها لأي انتماء تاني سواء ديني او ثقافي انت الخسران عشان انت ساعتها هتبقي بترقص على السلم ، هتبقى بتنكر بلدك واما تروح للبلد التانية هتنكرك .

أنا منكرش اني من لباس التيشيرت والجينز والكوتشي الاديداس وبقى صعب ان انا ارجع البس جلابية زي ابو جدي .
بس اللي قدرت اعملة اني احترم الجلابية الفلاحي والقفطان وثقافتها ، انا واحد صاحبي شافني بسمع السيرة الهلالية ومنتشي قوي "وتاريها الدراهم ما تنفع " وقاللي ايه القرف ده وكرر نفس الجملة اما شاف الفيديو بتاع حمزة الدين على اليوتيوب وانا من عشاق الراجل ده اللي مخدش حقه في بلده واللي قدرت عليه اني قلتلة الكلمتين بتوع احترام الثقافة دول.

انت لازم انت اللي تتعب وتعمل بلدك مش تروح لنموذج جاهز اصحابة تعبانين فية ، كفاكم كسل وضعف شخصية.




Online Users

الأحد، 12 أبريل 2009

Ishtar Alabina




مغنية اسرائيلية ولدت في اسرائيل من اب مغربي و ام مصرية بتغني بلغات كتير عبري و فرنساوي و انجليزي واسباني
وبتغني اغاني عربي من بتاعتنا- بص في الصورة فوق- و تحطها في البوماتها يعني بتكسب منها وتحس ان الاغاني دي ملهاش صاحب او هي اشترتها فعلا واحنا ظالمنها نفسي اعرف

انا فاكر يوسف شاهين كان عايز يحط اغنية نيويورك بتاعة فرانك سيناترا في فيلم اسكندرية نيويورك طلبوا منه مبالغ كبيرة

فين اصحاب الاغاني دي ولا ورثتها يرفعوا قضايا

على فكرة هي من دعاة السلام بس ده برضة مش معناه اننا نتسرق واحنا بنطاطي


اتفرج على الاغنية دي كده


وادي الموقع بتاعها

Agora 2009 the movie


صدفة عجيبة ....... على شهر 10 هينزل فيلم اسمه AGORA فيه قصة الصراع بين المسيحية والوثنية نفس اللي كان في عزازيل
في انتظاره



الجمعة، 20 فبراير 2009

هيباتيا والبابا كيرلس عمود الدين (2)




رد القمص عبد المسيح بسيط استاذ اللاهوت الدفاعي على مسألة هيباتيا



رواية عزازيل تريد خلق إله جديد وشيطان جديد ودين جديد!!

بين الأوهام والإلحاد والإباحية


صورت الرواية البابا كيرلس عمود الدين في الصفحات (68و112و146و148و151-153و175و177و185و249-250و274و345) بالمحرض والسفاح والذي يدفع الرشاوى والذي أجبر حاكم الإسكندرية على طرد اليهود والهراطقة من الإسكندرية دون أن يذكر أسباب هذه الأحداث!! كما أنه اعتمد مثل الكثيرين من الكتاب الغربيين على ما كتبه إدوارد جيبون (1737- 1794م) في كتابه " تاريخ أفول وسقوط الدولة الرومانية " والذي كان متحاملا على الكنيسة، مثل الكثيرين من كتاب القرن الثامن عشر بدرجة شديدة، والذي بالغ مبالغة شديدة في الإساءة للمسيحية!! كما أن د . يوسف زيدان نفسه وصفه بالقول " إن كتاب (جيبون) هو اليوم من الأعمال الكلاسيكية التي يرجع إليها القارئ العام، لا المتخصصين. فقد عاش مؤلفه في القرن الثامن عشر واجتهد في التأريخ لانهيار الرومان، فصار كتابه مشهوراً في زمانه. ولكن في زماننا هذا، هناك دراسات أخرى أكثر تقدماً وتخصصاً. مما يجعل كتاب (جيبون) عملاً ممتعاً لعموم القراء، لا مرجعاً لأساتذة الفلسفة. وتقول جميع المراجع أن أورسيتس حاكم المدينة كان متعاطفا مع اليهود زيادة عن الحد مما دفع اليهود لاستدراج المسيحيين إلى فخ فقتلوا منهم العشرات بل المئات فهاج عامة المسيحيين بسبب ذلك وحاولوا الانتقام من اليهود ولكن القديس كيرلس منعهم عن ذلك وتفاوض مع حاكم المدينة أورسيتس على طردهم من المدينة درأً للفتنة. كما أتهم، القديس كيرلس بأنه حرض على قتل الفيلسوفة المصرية هيباتيا!! يقول المؤرخ الكنسي سوقريتس من القرن الخامس: " أنها (هيباتيا) سقطت ضحية للغيرة السياسية التي سادت في ذلك الوقت لأنها كانت تقابل أورسيتس كثيرا وشاع بين عامة المسيحيين أنها هي التي تمنع اورستيس من استشارة البطريرك وبسبب هذه الغيرة أسرع بعضهم وعلى رأسهم قارئ يسمى بيتر وهي في طريقها لمنزلها وجروها من مركبتها وأخذوها لكنيسة تسمى قيصرون حيث قتلوها ومزقوا جثتها إلى قطع وأخذوها إلى مكان يدعى سينارون وأحرقوها. ويقول جون اسقف نوكيو من القرن السابع نفس التفصيلات ولكن يعلل سبب ذلك بأنها كانت تشتغل بالسحر، وكليهما لا يشيران لأي دور للقديس كيرلس في ذلك وقد أنتشر بعد موتها خطاب مزيف نشره المؤرخ الوثني داماسيوس (458 – 538م) التصق فيه تهمة قتلها بالقديس كيرلس ويبدو أن من جاء بعده مثل جيبون وأعداء المسيحية من الملحدين مثل فولتير الذي كما يقول د . مراد وهبه: أنه استعان بصورة " هيباتيا " للتعبير عن اشمئزازه من الكنيسة ومن الدين الموحى (يقصد: الموحى به!) وبرتراند رسل الذي " وصف جيبون لقتل " هيباتيا "وقال معلقا بامتعاض إن " الإسكندرية، بعد هذا الحادث، خلت من متاعب الفلاسفة ". يوقل صاحب موقع (http://africano.manalaa.net): " كما أن لاهوت " كيرلس " لم يكُن أمراً مستحدثاً كما صوّر الكاتب. بل أن تعبيرات " كيرلس " عن " طبيعة واحدة للكلمة المتجسد " مازالت تعتبر - إجماعاً وعلى اختلاف الطوائف - من أساسيات اللاهوت المسيحي. أما رسائله " ضد نسطور " فهي من أدق ما يمكن قراءته في شرح اللاهوت المسيحي. إن " كيرلس " يبدو في الرواية كمهووس بالزعامة ومتاجر بالدين. والواقع أنه بالطبع ملومُ في حادثة مقتل " هيباتيا "، لكنه لا يمكن الحكم عليه من منطلق حادثة واحدة وقياس تصرفاته كلها عليها. في الرواية هو يمثل السلطة الدينية الرسمية - عامةً - وإجاباتها الجاهزة؛ لكنه في المقابل قد ظُلم - كشخصٍ تاريخي - في تقديمه بهذا الشكل. على هذا المثال قُدمت كنيسة الإسكندرية بشكل أقرب للهوس الديني والفاشية. يهدف المؤلف لتصوير التدين الرسمي والشعبي وهذا مفهوم، لكن كنيسة الإسكندرية لم تعرف أبداً في تاريخها " جماعة محبي الآلام " التي تم الإشارة إليها أكثر من مرة في الرواية! كما أن مقتل " جورج الكبادوكي " لم يكن عملاً دينياً بقدر ما كان ثورة شعبية ضد رئاسة دينية مفروضة بقوة السياسة وفي ظروف نفي للرئاسة الدينية الشرعية. كذا نظرية موت " آريوس " مسموماً وإن كانت تعطي مصداقية للرواية فإن حولها علامات استفهام بما لا يجوز معه تقديمها مرتين كأحد المسلّمات!


حمل الرد كاملا من

هنا


التفسيرات الثلاثة الاشهر في هذا الصدد هم سقراطيس الذي اوردة القمص عبد المسيح عاليه و جيبون المورد في الاعلى ايضا وثالثهما هو يوحنا اسقف بلدة من بلاد الدلتا الذي كان يؤيد كونها ساحرة كما كان يعتقد عند قتلها

طالع هنا

هيباتيا والبابا كيرلس عمود الدين من عزازيل (1)

البابا كيرلس الاول(عمود الدين)



في مبتدأ الامر أود ان اوجه شكري وعرفاني للسيد يوسف زيدان على روايته الرائعة عزازيل
او بالاحرى ان اشكر ايضا هيبا الراهب الراوي لحكايتة تلك او عزازيل الذي جعله يكتب تلك الرقوق
فقد اضاء بصري على عدة اشياء وانا لم اصل بعد الى نصف الكتاب
في بداية قرائتي له وانا مسيحي ارثوذكسي احسست ان يوسف زيدان هذا يهدف الى الشهرة باثارة القلاقل في الكنيسة
خاصة عندما ذكر نسطور كصديق لهيبا واريوس كموضوع حديثهما ومحاولة تجميل صورتيهما
وهما من اشد الهراطقة في المسيحية وطالما اعطينا دراسات عنهما منذ كنا في مدارس الاحد في طفولتنا
وأيضا التعرض لقصة زنا متكرر ومطول مع اوكتافيا بالنسبة لراهب وهذا امر غير مقبول على الاطلاق

ولكن وقفت امام حادثة القتل البشعة الوحشية لهيباتيا الاستاذة الفيلسوفة معلمة الفلسفة والرياضيات
قتل هيباتيا

وقد يكون الجميع على علم بذلك الا انا واقراني داخل الكنيسة وقد يكون البعض داخل الكنيسة يعلمون ولكنهم يتكتمون عن تلك الحادثة البشعة
هيباتيا العالمة الجميلة التي قتلها شماس (ممن يلبسون الابيض في الكنائس و يرتلوا في القداس)كيف ذلك!؟
ورتبة ذلك الشماس هي قارئ او اغنسطس وهي من رتبة في الشموسية وهو من يقرأ الانجيل
بتحريض من البابا في ذلك الوقت هو البابا كيرلس الاول الشهير بعمود الدين ويتضح من تسميتة ان له كرامة وتأثير ومن اشهر البطاركة في تاريخ الكنيسة
فبحثت عن هيباتيا بعد ذلك لأني لم اكن مصدقا حدوث تلك الجريمة وبمباركة ذلك الرجل
فوجدته صحيحا تماما حتى ان كتب الكنيسة تذكر طرد اليهود من الاسكندرية من منجزاته
ويتكرر مشهد من الوصف الدقيق في الرواية لما كنا نراه من جهتنا نحن الاقباط مشهد صلاة الجمعة في مسجد كبير يزعق خلالها الامام يلهب الحماسة لدى الناس ليخرجوا فيحرقوا كنيسة مثلا
تابع معي هذا المشهد البابا في الكنيسة يوم الاحد يزعق في الناس بالصلوات الدينية و بضرورة تطهير الاسكندرية من يهودها و وثنييها لتكون على حق مدينة الله
لتخرج الناس الى الشوارع صارخين "هلم نهدم بيت الاوثان ونبني بيتا جديدا للرب"الترنيمة الدموية كما وصفها الكتاب"
حتى ظهرت عربة هيباتيا -التي كانت تعطي دروسها الاحد خوفا من بطش المسيحيين لتضمن انشغالهم بالقداس-وما ان نادى احدهم ان "ان الكافره في عربتها دون حراس فأمسك بها بطرس القارئ"
و سحلوها في شوارع الاسكندرية من شعرها خالعين عنها كل ثيابها وكانت تحاول فاشلة اخفاء عريها حتى خارت قواها تماما فجاؤا بأصداف البحر ممزقين لحمها ثم القوا عليها الاخشاب واحرقوها
وعند اي خلاف من الحاكم -المسيحي-معهم كانوا ينعتونه بالكافر ..........فما اشبه اليوم بالبارحة
بالمناسبة السحل في شوارع الاسكندرية هي نفس الطريقة التي استخدمت مع القديس مارمرقس كاروز الديار المصرية وأول البطاركة حتى استشهادة وهو كان من يُعلم الناس ايضا ولم يمسك سيفا
فهؤلاء الناس الذين قتلوا مارمرقس هم نفسهم من قتلوا هيباتيا ولكنهم فقط غيروا عباءتهم وشكلهم الخارجي أو لنقل انهم لونوا الدين باللون البشري
وحفيدهم من حاول قتل نجيب محفوظ رواية اولاد حارتنا تلك التي تحوي -عن عمد او دون عمد- قصة الاديان الثلاثة بسبب تجسيد الله في شخص رغم ان عبقرية رسم هذا الشخص في وجوده في حوار الناس او في قلوبهم وكان مؤثرا في الاحداث بشكل غير مباشر وقد كان طوال الوقت في بيته الكبير
حتى ان موته كان على يد الشخص الذي عني به محفوظ الفكر العلماني الحديث الذي انتهت القصة علية لتنتظر ما سيأتي به التاريخ ايضا
في تلك الرواية ايضا كان رفاعة الذي يمثل المسيح داعيا للزهد عن المال وترك الغنى والعيش في سلام
"محبة المال اصل كل الشرور"تيمثاوس الاولى (6:10) ولاحظ محبة المال وليس المال

لكن بعد ان خُطف رفاعة في الظلام و قتله الفتوات ظهر في الافق احد متبعيه وكان اسمه علي
علي هذا جمع بعض متبعي رفاعة وانتصر على الفتوات وحمي روح الوداعة التي كان ينادي بها رفاعة بالقوة ....... والآن عرفت من يكون علي وقد احترت لأمره في السابق
لم اكن اعلم عن تلك القسوة لرجال الدين هنا على الاقل لأني كنت اراها في محاكم الكاثوليك التي كانوا يحاربون بها الأفكار الجديدة التي دعوها بالهرطقات
وأذكر منها واقعة جاليليو عندما انكر ان الأرض مركز الكون وانها تدور حول الشمس ولكنه اعلن ايمانه حتى تمت تبرئته بعد اعدامة ب 350 عاما
وهذا ما كتب عنه علماء الحملة الفرنسية أيضا في الجزء الأول من كتاب "وصف مصر" عن ان الاقباط يطيعون الكاهن حتى ان كان اكثرهم جهلا
و هذا كان الاغلب فكان الكهنة يأتون من اكثر الطبقات جهلا و فقرا في ذلك الوقت
في النهاية يهتم كلٌ بما له فعلماء الدين بالدين فقط وعلماء الدنيا بالدنيا فقط
وأعود في النهاية للموضوع الأصلي من توسعة المواضيع التي اعشقها الى هيباتيا والى الكنيسة فمن المؤكد لدينا الآن ان هيباتيا قتلت على يد بطرس والمسيحيين واى ما يخالف ذلك هو محاولات لتجميل الصورة وجاءت متأخرة
مثل ما كتبت (Diodata Saluzzo Roero ) ان هيباتيا صارت مسيحية بالفعل على يد البابا كيرلس وقتلها خائن
فالخلاف الآن هل كان قتل هيباتيا بمباركة البابا او لا او كان في الحسبان ام لا وهذا ما ننتظر من اجله كتاب القمص عبد المسيح بسيط استاذ اللاهوت الدفاعي خاصة ايضا بعد اتهام الرواية له برشوة المحققين الذين ارسلهم الامبراطور في روما
ولكن اذا اثبتت ادانة البابا او الكنيسة فأني أطالبها كما اعترفت الكنيسة الكاثوليكية في روما بخطئها في حق جاليليو سنة 1992
ان تعترف الأرثوذكسة بخطئها في حق هيباتيا هي الأخرى خاصة انها اتت من رأس الكنيسة في ذلك الوقت
فجل من لا يخطئ ونعم من يسرع بالتدارك .



الاثنين، 16 فبراير 2009

سارق الملكوت و الاحترافية في الانتاج المسيحي

اتفرجت من كام يوم على فيلم "سارق الملكوت" عن قصة مجدي يسى قصة التوبة العجيبة وهو اول ما انتجت ايبارشية الاسماعيلية وطبعا انا اخدته من واحد والواحد ده جابه من على النت يعني مسرووووق والعوض على الانتاج بقى


فريق العمل

الفيلم من انتاج
كنيسة السيدة العذراء مريم بالإسماعيليه

سيناريو وحوار
هيثم سعد

بطولة
اشرف فاروق
جميل عزيز
عماد الراهب
بيتر سيف
محمد جمال
سامي عزيز
شادي رمسيس
عماد غراب
جينا شارل
هيثم سعد
جورج منير
سامح صبحى
مريانا وجيه
انور غبريال
ماريت ميلاد
ماريان وهيب
هانى عبد المسيح
مايكل طلعت
مينا وجدى
كرم :العسكرى
بولا عزت
فادى جرجس
عصام مصباح

موسيقى
جورج نسيم

ترنيم
جورج نسيم
ماريان إسكندر
تآليف الترانيم
ريمون إبراهيم

مونتاج
مايكل عزت
سامي عزيز

مدير التصوير
ميشيل ميلاد

ساعد في الإخراج
مايكل طلعت
ميرنا شارل
جون بولس
هاني مجدي
ماريانا وجيه

ماكيير
عمرو

ساعد في المكياج
ماريان وهيب

اشرف على الآنتاج
القس يواقيم جرجس

قدم الفيلم
نيافة الحبر الجليل الآنبا سيرافيم
اسقف الإسماعيليه و توابعها

الفيلم من اخراج
ريمون ابراهيم

الفيلم مش وحش وبيقولوا مصروف عليه كويس بس برضه تحس انه شغل هواة يعني فيه غلطات غريبة برضه نقولها عشان نبقى احسن
  • اولا : الديكور الداخلي مش وحش بس في حاجات صغيرة زي السيراميك في مشهد غذاء الاسرة ومفاتيح النور كلها حديثة
  • ثانيا: التصوير الخارجي سيء جدا لأن العمارات مش قديمة و بيبان كتير وبوضوح مواسير الغاز الطبيعي
  • ثالثا : أواخر 1958 كانت في وحدة بين مصر وسوريا يعني اللوجو بتاع البوليس غلط (فيه نجمتين)

بس ربنا يعوض تعبكم

والمشكلة هتفضل موجودة طول ما هو شغل هواه والفيلم ده احسن كتير من غيره .
ايه المانع لو بقى في شركة انتاج كبيرة ليها دور عرض تبقى الكنيسة بالكامل تملك فيها اسهم مش ايبارشيات وتنتج افلام قليلة مش مشكلة بس يكون فيها شغل كويس وتتعرض على كل الناس وايه المشكلة الانغلاق ده مش صح ما هو فيلم الام المسيح دخله مسلمين كتير شافوه واتأثروا وعرفوا اكتر عن جيرانهم المسيحيين ومخرجوش يعني سابوا الاسلام عشان الفيلم فمافيش داعي للخوف من المسلمين او المسيحيين
الموضوع لو اتساب لوحده خالص بدون تشنج مش هيحصل اي مشاكل بس يتساب بس .