الثلاثاء، 26 أكتوبر، 2010

بالعقل




حكيت الحكاية دي لسواق التاكسي لما سألني عن رأيي في الأخوان

راح التلفزيون معرض الكتاب يصور مع 3 زوار للمعرض يسألوهم ايه احسن حاجة في المعرض السنة دي ؟
أول واحد قال : اعادة النشاط لترجمة الادب الروسي .
تاني واحد كان جاي المعرض مع واحد ملوش في الكتب قعد يفكر يخرج ازاي من المزنق ده
لما سألته المذيعة قال لها : المصحف طبعا
ردت عليه : طبعا طبعا لكن ايه عجبك تاني؟
رد بإصرار : كتاب الله وليس سواه.
سابته المذيعة وراحت لتالت واحد تسأله
قال لها : المصحف طبعا وبرضه اعادة نشر كتب الفلسفة لسارتر وديكارت .

الراجل التاني ده عمل ايه ؟
احرج اللي قبله وخلى اللي بعده يقول المصحف قبل رأيه
يعني خلى اللي بعده مجرد يزود كلمة قبل كلامه
معلموش حاجة .. مفادوش بنكلة
المجتمع مافيش حاجة فيه اتحسنت
ويعني أول واحد ده دينه منقوص مثلا؟؟!!
افرض المجتمع كله بقى بيقول السلام عليكم بدل صباح ومساء الخير
وكل ما يدخل حته بيقول دعاء
ويلبس لبس ناس تانيه في مكان تاني من 14 قرن
طب ليه صحيح منقولش ان الرسول كان بيلبس زي مجتمعه
كان شبههم ومحاولش ينفصل عنهم رغم مكانته
مش دي فكرة برضه
او الناحية التانية يقولي بإذن المسيح او سلام ونعمة
وكل واحد فيهم بيحاول يعيش في مجتمع طائفي
منفصل عن الآخر
هو ده يعني الدين
بجد تحسهم زي اللي بيلم سكور(score) في لعبة
ده انا لو مكان ربنا هنفخهم
ازاي بيعاملوني على ان عقلي صغير كده
يا جدعان ده ربنا عرفوه بالعقل

والله ده اهلنا الفلاحين دول كانوا فلاسفة جنب الناس التانية دول
بالعقل ... بالعقل ... بالعقل

هناك تعليقان (2):

Kontiki يقول...

:):) بوست رائع فعلا

Ramy يقول...

جميل البوست يا اندروا

بجد كلامك فى الجون

المهم تجميع النقط علشان الجنة مفهاش محاولات (:

تحياتى