الجمعة، 14 مارس 2014

خلصت جيش!


مداخن من تصميم المعماري الأسباني أنتوني جاودي



كده ببساطة ماسك قلم في ساعة متأخرة من آخر ليلة بقضيها في فترة التلات سنين العارضة على حياتي و هرجع أكملها عادي.


وبعيد عن كل الصعبانيات اللي كنت بكتبها طول الفترة دي والكآبة اللي كان بيشوفني فيها أهلي وأصحابي - وبعتذر ليهم عنها - هتكلم عن الجانب الجيد ، لما لقيت نفسي متوزع في القاهرة بعد ما عديت فترة الكآبة حطيت خطة أستغل بيها الوقت من كل النواحي وإتنفذت بنسبة تزيد عن 75% يعني جيد جدًأ. :)

على مستوى الخبرات أنا قصدت أدخل في تحديات صعبة على شخصيتي جدًا وفشلت كتير ، وأرجع أدخل تاني وتالت لدرجة اني يأست في فترة لقيت ربنا بعتلي أكتر من واحد من جوه الجيش يقولولي ان أنا عرفت أتعامل في المواقف اللي أنا كنت مقتنع اني فشلت فيها بس ادتني دفعة معنوية كبيرة ، وآخر شهر بالذات عملت حاجات مش مترتبلها بطريقة أذهلتني شخصيًا.

على مستوى الثقافة العامة قريت كتب كتير و ذاكرت مواضيع كتير كانت على الليستة بقالها كتير وعملت ثقافة سينمائية كويسة.

على مستوى المجال العلمي قريت كتب ومواضيع في المجال الهندسي كان مهم تعدي عليا ونجحت في أول إمتحان في المعادلة في الجامعة الأمريكية وبخلص حاليا دبلومة في إدارة المشروعات من جامعة عين شمس بالإضافة إني أعدت أحرت في اني أشتغل في مجالي (الهندسة المدنية) في مكاني لحد ما وصلت لكده في اخر سنة وإستحدثت الوظيفة دي للناس اللي هييجوا بعدي.


على مستوى الهوايات لسه كلها موجودة من الكتابة للمزيكا ، والمزيكا بالذات خدت مجهود كبير ، من واحد بيتمرن كل يوم وفجأة يبقى في أحسن الحالات يتمرن كل أسبوع ، لما كنت بمسك الجيتار بعد ما أروح ألاقي نفسي بغلط غلطات في الأساسيات ، ده خلاني أفكر كتير أسيبه وده يفسر الصور التشيزي اللي عندي ع البروفايل على غير العادة ، أيوة كنت بشجع نفسي عشان أكمل ، وكملت واتمرنت ووصلت للمستوى القديم وزودت عليه حتة كمان.

على مستوى اللايف ستايل إحتفظت بيه ثابت تمامًا بدون أي تغيير بحيث اني بنسبة كبيرة انهاردة نفس الشخص اللي كان داخل الجيش من تلات سنين.

قد كل الكآبة وشغل الفرافير - كأني الوحيد اللي دخل جيش في الدنيا في الفنرة اللي فاتت - قد إحساس النجاح والإنجاز اللي أنا حاسس بيه إنهاردة اللي كان تفريغ الضيق مهم جدًا ليه ، عشان ألاقيك بتطبطب عليا من غير ما أطلب منك ، ده غير فيديوهات كتير مسجلها لنفسي في فترات اليأس مش للنشر ، عشان تفضل معنوياتي عالية عشان أقدر أكمل المطلوب ويبقى من حقي اني احتفي بنفسي دلوقتي. 
اذا كان الجيش أول تحدي في حياتي العملية ، فأنا إجتزته.

هناك تعليقان (2):

Ramy يقول...

أولا مش هسأل ازيك أعتقد أنك شرحت كل حاجة اهوا :)

ثانياً حمد الله على السلامة يا اندروا

ثالثاً انا مبسوط جداً أنك قدرت تعدى الفترة دى بحاجة إيجابية فى حياتك برافوا عليك

رابعاً و دة المهم

بجد هما التلات سنين عدوا ؟؟!!!

ربنا يوفقك فى اللى جى و اعتقد أنك أن شاء الله هتقدر تعدى أى شيىء صعب هيقابلك :)

:)

Andrew يقول...

شكرًا يا رامي الله يسلمك :)
اه عدوا .. وعدوا عليا 30 سنة مش تلات سنين ، بس الحمد لله خلصوا.