وأنا صغير في تالتة رابعة ابتدائي كده طقت في دماغي ابقى مشهور
كنت ساعتها واد في حالي ، أصحابي شلة محدودة والباقي ولا أعرف عنهم ولا هما يعرفوا عني حاجة
فجأة بدون مقدمات بقى نفسي ابقى مشهور زي البنت بتاعة الاذاعة او الواد اللي بيطلع الأول على طول ده
طيب أعمل ايه؟؟
جاتلي فكرة خبيثة .. قلت أعمل تمثيلية على العيال في المدرسة
كانت تيتة لسة جايبالي سلسلة دهب في بتاعة قماش كده شبه صرة الدنانير
مسكت صرة الدنانير دي وجبت سكينة وقعدت اكحت فيها لحد ما وبرت واتبهدلت
وقلبتها وعملت نفس الكلام وبعدين نزلت غرقتها في التراب والطينة لحد ما بقى لونها رمادي بدل الأحمر
وبعدين شلت الخيط النضيف وحطيت بتاع تاني لقيتة في الشارع
وطبعا الوقت الرهيب ده كانت الساعة اللي ما بين رجوعي من المدرسة ورجوع امي من الشغل
المهم .. كان عندي عملتين تلاتة مكتوب عليهم كلام مش فاهمه كده بس شكلهم قديم
قعدت ادور تاني ملقتش غيرهم
فسرقت شوية كمان .. أيوة سرقتهم من واحد قريبي
انا مش فاهم ازاي عملت كده في وقت كنت طفل متدين جدا
بس ده يوضح قد ايه كنت مصر اعمل اللي في دماغي
وحطيت الدنانير في الصرة وبصيتلها كدة
شغل عالي تشوفها تقول فعلا حاجة قديمة
حطيت الخطة .. وكنت بروح متأخر جدا من المدرسة عقبال ما كان بيجيلي التاكسي
دفنت الصرة في الحوش بعد ما حفرتلها حفرة محترمة..وروحت
تاني يوم جيت المدرسة كالعادة بدري وقعدنا نلعب شوية قبل الطابور
وانا بجري عملت نفسي بقع في مكان الكنز المدفون
وقعدت على الارض وعملت نفسي لقيت حاجة .. وهوب
طلعت الكنز وطلعت العملات
وقعدت أقول شوية كلام في التاريخ اللي كنت سمعتة من قريبي على العمل
وقلت شوية هتش عن الثورة الفرنسية وبتاع
بقيت أشهر واحد في المدرسة
والواد والبنت المشاهير دول لقيتهم جايين يتصاحبوا عليا
"ممكن نشوف العملات اللي لقيتها" كان الطلب الرسمي
والمدرسة كلها بقت تعرفني
وفجأة زهقت من الشهرة
و بقيت اشوف الواد والبنت دول بطنشهم
وبطلت اجيب العملات معايا المدرسة
ورجعت مع شلتي القديمة زي ما كنت
وبعد فترة الناس نسيت ورجعت كل حاجة زي الأول
في فيلم (Nowhere Boy) اللي بيتضمن السيرة الذاتية لبدايات جون لينون
ذكر احداث معينة وقال في نهاية الفيلم
ده اسبوع من حياة جون .. وعمره بالكامل هو مجرد تكرار للأسبوع ده ;)
هناك تعليقان (2):
قصة حلوه
احلى ايام هي ايام الطفوله
كركور
اهلا بيك على النوتة
بالتأكيد أحلى أيامنا
إرسال تعليق