الاثنين، 19 مارس، 2012

هو فيه ايه؟



ايه اللي بيحصل في مصر؟ ايه كم الأحداث الكتيير اللي بتحصل دي؟
رغم اني مش قادر اتابع بشكل جيد الأخبار عشان ظروف الجيش الا ان فيه صورة عندي ايتدت تتكون


الوضع العالمي
الظروف الحالية عالميا بتقول اننا في عصر بدء أفول الامبراطورية الأمريكية وهي ان منحناها يبدأ في النزول وفي الظروف دي بتتجمع القوى الموجودة في المركز التاني ومنها مثلا القوى الصاعدة في امريكا اللاتينية وجنوب شرق اسيا وروسيا
لحد دلوقتي اللي ابتدوا يتدخلوا روسيا وبعد طول غياب الصين وعملوا حلف مع ايران علشان يغلسوا على امريكا فبقت معركة تكتلات وصراعات على مصادر القوة زي الخناقة اللي بتحصل على الدول اللي كانت جزء من الاتحاد السوفيتي زمان بين امريكا وروسيا عشان أمريكا عايزة تضمن ان الغاز الموجود في المنطقة كلها يبقى تبعها ويتباع بالدولار عشان لو متباعش بالدولار العملة هتسقط
الصين وروسيا مسيطرة على التنقيب على الغاز في حتت كتير وروسيا بالذات بتحاول تخلي اوربا تعتمد عليها في الغاز عشان تضرب امريكا وعملت خط منها اسمه نابوكو يوصل لأوربا
في المقابل بدأت أوروبا وفي وسط ظروفها الاقتصادية الزفت بتداعب اوكرانيا وصربيا من دول شرق اوروبا انهم ينضموا للاتحاد الاوربي


تقوم روسيا تعمل ايه؟؟ ترفع سعر الغاز بتاعها عند اوكرانيا فمتعرفش تسدد فتفضل تحت باطها ودولة زي بيلاروسيا تخفض عليها سعر الغاز عشان متبصش برا :)




فتقوم اوروبا تلم من بعضها عشان تساعد صاحبتهم اوكرانيا




لاحظ تصريحات بوتين "انتهى عصر الغاز الرخيص"




ـــــــــــــــــــــــــــــــــــــــــــــــــــ


مصــــــــــــر


علاقتنا ايه بكل ده؟؟ امريكا عايزة حشد ورجالتها يبقوا في صفها ولما لقت التيار الاسلامي صاعد في مصر - بتدبير او لا - شافت انها لازم تتصاحب عليه فصرفت كتيييير جدا عليهم  ليه؟ احنا هنفيدهم في الغاز اولا وهنفيدهم عشان يخبطونا في ايران على اساس انهم شيعة وعندنا وعندهم الدقون مبتتوصاش لو قالولهم بستكك عليه.
مولت امريكا التيار الاسلامي اخوان وسلفيين عشان التمويل مش شرط يكون فلوس في ايديهم لكن في المرة دي تدريب.




ودي القضية المعروفة بقضية التمويل الأجنبي
اللي حصل بقى ان الجيش عرف ان المنظمات دي دربت الاخوان والسلفيين .. عمل ايه؟؟ قام قافش عليهم وسجن كل الناس ومنع الامريكان من السفر وجه رسالة قوية للأمريكان بيقولهم فيها انا لسه الحاكم ولسه القوي يا أمريكان مش هتبيعوني لصالح العيال دول ... يعني لو عايز تكلم شعب مصر تجيلي انا
وأكد كل الكلام ده لما بمنتهى البساطة روح الأمريكان بالعند في كل منظمات البلد عشان يؤكد انه لسه الكبير في البلد دي


الحوار ده خلى البرلمان هيتجنن وضحى فيه الجيش بحكومة كارتها محروق اصلا .. فهيبقى اقصى طموح الاخوان انهم يروحوا الحكومة اللي هي مروحة اصلا بدري شوية ... قفا صقع


كده كده الجيش مش خارج منها .. تخيل معايا 3 فرافير ورثوا بيت ومعاهم الفتوة للي بيحرس البيت ... واقعيا محدش في التلات فرافير اللي هيرأس البيت هيتحرك الا بإذن من الفتوة


اذن الغالب ان الجيش شايف مصلحة مصر في ان التيارات اللي بيسهلها كل حاجة تبعد عن الحكم وهو بيسهلها كل لوسائل انها تفضح نفسها وتوقع نفسها في فضائح زي مناخير البلكيمي وغيرها من الفضايح المنتظرة في الدستور العبيط اللي هيكتبوه عشان الجزء النشط في الشعب يسأم من التيارات الدينية فيحاول اسقاطها او يغمض عينه عن محاولات الجيش لإسقاطها.
والشعب في الأغلب من السذاجة انه يصدق اي حاجة تتقال في الفترة دي


الاخوان بيحاولوا كعادتهم انهم يسيطروا على كل شيء كعادتهم الشمولية وفي نفس الوقت مقلقين من الجيش ومش عايزين يخسروا باقي الجهات الثورية قليلة العدد شديدة النشاط فكل فترة يفقعوا تصريح ضد المجلس العسكري عشان يجاروا الموجة ويعملوا فيها انهم بيراعوا كل التيارات والكلام اللول ده لكن فعل واحد لو ركزت ...مفيش فيبقى الرهان على التسوية والاستقرار لحين انهم يسيطروا على كل شيء مؤسسة مؤسسة


ادينا بنتفرج


وربنا يحمي مصر

ليست هناك تعليقات: