السبت، 23 يونيو، 2012

جيمس دين




 


سنة 1955 كان المخرج الكبير ايليا كازان بيدور على ممثل يقوم ببطولة فيلمه الجديد "East of Eden" قدام الجميلة جولي هاريس ، الدور المطلوب معقد وعايز ممثل كويس.
الدور لشاب حساس عنده مشاكل مع والده ، والمفروض ان امه ميتة وهيكتشف انها لسة حية وبيعمل شخصية اخوه التوأم.


"الدور ده عايز مارلون براندو" كان ايلي كازان بيقولها لحد ما اتعرض عليه الشاب "جيمس دين" اللي مكنش مثل غير في شوية اعلانات وحلقات درامية في التلفزيون.




الأول شخصيتة معجبتش كازان ، شاب متقلب المزاج بس حس انه هيبقى مناسب للدور.
لما ابتدا التصوير كان باين على جيمس دين انه مختلف عن باقي الممثلين ، عنده حاجة جديدة.
في الفترة دي كان اغلب الممثلين بتوع مسرح في الاصل فآدائهم استعراضي مسرحي زي يوسف وهبي عندنا كده في فترة من الفترات .... وزي الدور الي كان بيعمله محمود حميدة في ملك وكتابة بتاع كاملة ابو ذكري.
انما جيمس كان آداءه واقعي جدا ومش مفتعل لدرجة انه اكتر من مرة في الفيلم ميلتزمش بالسيناريو ويمثل حاجة تبقى احسن من السيناريو ويقرر كازان يحطها في الفيلم.
زي المشهد ده

  .


اتعرض الفيلم ونجح جدا واخد احسن فيلم في كان وجولدن جلوب .. اما جيمس جاتله ترشيحات أحسن ممثل بس مكسبش.


نجح جدا جيمس واتشهر وقدم فيلم تاني في نفس السنة "Rebel without a cause" وفيلم السنة اللي بعديها بنجاح ساحق" Giant".
تحول في خلال سنة لرمز الشباب الامريكاني الجامد .. الشخصية اللي بتتهافت عليه البنات ، مستقبل السينما الامريكية ابتدا يبقى معروف مين صاحبة ، شركات الانتاج بتغرقه فلوس ، بيعمل اللي هو عايزة ، و بيحب العربيات والسباقات ، بيجيب عربية ويبيعها ويجيب غيرها ويعيش عيشة شاب مترف في نيويورك بكل تفاصيلها.


... ومات في حادثة بعربيتة الجديدة !!!!


الحادثة عملت صدمة بشعة للناس ، نجم عنده 24 سنة ، مكنش حد يعرفه من سنة ، فجأة بقى مشهور ،,فجأة مات.
وتحول لواحد من رموز السينما والثقافة الأمريكية.


وزي ماغنوله الايجلز (بتوع هوتيل كاليفورنيا) "عاش سريع ، مات صغير ، وداعا جيمس" 


هناك تعليقان (2):

Ramy يقول...

أنا هعلق برغم المود اللى مش تمام اللى انا فية

و انت زودته بالبوست دة

عارف ليه فى شخص عزيز جدا على قلبى كان بيحب جيمس دين جدا

و كان عنده بوستر كبير جدا ليه فى غرفة المكتب بتاعته

......

صحيح خلصت الجيش و لا لسه

بس باين على الحلقة اللى فى الصورة

انه لسه (:

....

على فكرة انا بكتب التعليق و انا مبتسم

فمتزعلش من سخافة التعليق

أرجو دة

شكرا مسبقا للتفهم

Andrew Yousef يقول...

اهم حاجة انك ظبطت نفسك متلبس بالابتسام ؛)
لسة بدري عليا في الجيش بس زيك بحاول ابتسم :)