الأحد، 15 مايو، 2011

حصة إحصاء

يلا منك له ليها كل واحد يجهز الورقة والقلم والآلة الحاسبة ويقعد مكانه عشان هنبدأ الدرس
انهاردة حصة إحصاء ( statistics ) بالنسبة للناس اللي متعرفش عربي
ودرسنا هيبقى عن الأحتمال (probability)
وهو بيتكلم عن حساب احتمال حدوث الشيء عشان يساعدنا على إتخاذ القرارت
ودايما بياخد الشكل ده

يعني مثلا لو خدناها دراسيا هتلاقي الناس اللي جايبة امتياز او ساقطين قليلة وباقي الدرجات هما الأغلبية
يعني احتمال فلان يجيب امتياز حوالي 5% مثلا اما احتمال انه يجيب جيد 50%

تعالى ناخد مثال
ربنا وهو بيوزع الكفاءات على الناس اللي خلقهم في الدنيا ادى لكل واحد مواهب وقدرات معينة ولما بيوزعها ما بيفرقش بين الناس فقراء او اغنياء ، سود او بيض ، رجالة أو ستات ، او حتى دينهم او جغرافيتهم .. ربنا بقى
احنا مسألتنا بتقول اذا كان في مصر 100 شخص بين 40 مليون(فوق الأربعين) هم الأكثر كفاءة لتولي منصب الرئيس في هذه الأثناء مع ملاحظة ان كل شكوانا السابقة كانت من الكوسة وعدم تولي الأكثر كفاءة. أوجد إحتمال ان يتولى الأكثر كفاءة المنصب في الفكر السياسي السلفي والأخواني على حد سواء.


بفرض ان كفاءة النظام التعليمي في إثراء وإعداد المواهب 70% ونبقى متفائلين طحن
والستات في المجتمع 50%
والأقباط 10%
والملحدين والديانات الأخرى 2%
واللي بيشربوا خمور وولادهم بيلبسوا مايوهات 10% واخدلي بالك انت

يعني
مجموع المرفوضين فكريا = 10+2+10= 22%
مجموع المرفوضين جنسيا = 50%
مجموع من فشلوا في إكتشاف أنفسهم أصلا 30%

اذن
عدد الكفاءات التي تنطبق عليها الشروط =0.7*0.5*0.88*100=30.8 شخص
احتمال أن يتولى الأكثر كفاءة = 30.8%
نسبة المستبعدين عنصريا من الشعب = 0.22*0.5+0.5= 66%
فيكون أغلبية الشعب مستبعد عنصريا من هذا المنصب
ولأن المباديء لا تتجزأ فستنتقل العدوى للكثير من المراكز
فيمكننا التنبؤ بعدم دوام هذا النظام كثيرا في حال سيطرتة على مجريات الأمور كسائر الأنظمة العنصرية في التاريخ

يعني من الآخر شالوا الكوسة جابولنا كرنب
وبعد الزمن ده كله هيقلبوا ريحة البلد ... عنصرية

Maxim Vengerov - Brahms Hungarian Dance No.5


ليست هناك تعليقات: