الأحد، 7 فبراير 2010

من العالم الآخر

ها أنا الآن في قبري
انه قدري
قد نفذ صبري
لأعلم نهاية امري
هل ما علموني في حياتي صحيح
ام ضاع مع ما ضاع من العمر في مهب الريح
ما مصيري
وقد صار بيتي ضريح

مالك ايها الحائر
دهر وانت صابر
ما هي الا معدودات من ثوان
راحل من مكان الى مكان

سأعلم ما يحير الأحياء
وقد اخفته عنهم السماء
وتركت لهم الاختيار
لهم عقل ويملكون القرار

امي .. هل كنت على صواب
عندما علمتني الخلق القويم
أبي .. هل ما وصفت لي
هو الطريق السليم
او هو خصب خيال الانسان منذ القديم

بالامس صارعت جاري
فقد خالفني في افكاري
وكان يجب ان اعلن على مذهبه انتصاري
فلدينا الاعتقاد متوارث
وفي الخروج عنه كوارث
فيالشقائي
ألا يتسرب شك الى قلبي
الا بعدما انهيت في الحياة دربي

لقد شوهك من يدّعون
كونهم اليك يدعون
فالداعي لدين يبرز جماله
وقبح الاخر في خصاله

الا انني اثق في عدل من خلقني
من على صورته صورني
أعرفك بفطرتي
شعرت بك في حياتي
فلن تظلمني
او تريد ان تنل مني

ها .................


الأحد، 24 يناير 2010

نظرة خاصة



كمهندس مدني او في طريقي لذلك.. هاعيش عليكو دور استشاري ترميم مباني
هنرمم مبنى الوطن زي ما درست في الكلية


تقرير استشاري

وصف حالة المبنى :
بناء الوطن قائم على أساسات قوية ، شديدة العمق ، لم ينفذ الي تسليحه الصدأ بعد ، لكنه في خطر.
حالة الاعمدة :بعضها حالته جيدة و بعضها سيئ ضرب تسليحه الصدأ ، وصارت تلك الاعمدة غير قادرة على تحقيق الاحمال المطلوبة
وينصح بعمل قميص لها



الكمرات والاسقف (البلاطات)



في حالة مزرية ومهددة بالانهيار في اي وقت حديد التسليح وقد اكله الصدأ وسقط عنه من الخرسانة ما كان يستره
ويتضح التعشيش في خرسانتها فضلا عن الشروخ في الكمرات في اماكن القص و العزم مما ينذر بكارثة

تعشيش



بعض حديد التسليح ينبغي تغييرة والبعض الاخر يكفي ازالة الصدأ عنه واعادة زرعه ودهانه بمادة لحمايته
ثم يتم قذف خرسانة غنية بالاسمنت لتغطيته



يلزم اعادة بناء الاعضاء الذي يثبت ان الركام المستخدم فيها مملح بعد الفحص


ــــــــــــــــــــــــــــــــــــــــــــــــــــــــــــ

المنظومات هي الاساسات والاعمدة والكمرات والاسقف بترتيب الاهمية وهي اللي بتشكل بناء الدولة

والحديد هما البشر اللي بيديروا كل شئ موجودين جوه المنظومات ومش بنشوفهم
والحديد ده زي البشر بالضبط بيستحمل لحد معين وبعد كده بينهار

بنفس الدياجرام بتاع الحديد هيقاوم كتيييير
وبعدين لازم يضعف وينكسر عند fracture



مهما كان ايمانه بأي دين او حتى اي مبدأ بينهار قدام الحاجة
وده سبب انهيار الشيوعية في العالم

والحل على حسب الحالة اما اننا ننضف الحديد ده ( دماغ البشر ) او نستبدله نهائيا
وساعتها لازم نحسن ظروف انتاجه (المدرسة)

والركام اللي هو الرمل والزلط هي الظروف اللي بتأثر على الناس وتخليها تفسد والحديد يصدأ
ولو فيه مشكلة وطلع مملح ( فاسد ) يلزم اعادة بناء العضو (المنظومة)


ودعواتكم انجح في المادة دي ( الترميم )



الجمعة، 15 يناير 2010

انتو في اييييه

يادي المصيبة واحنا بنرجع ورا اميال
بيشدونا لورا ويجروا هما من حوالينا
كل حاجة بتبوظ من حولينا
مش عارفين نعدل حاجة
والمعدول عمال يتقلب
الطف بينا يا رب
عايزين اي حد يعدل البايظ
يمشي الامور يا رب
اتاتورك مصري يوجهنا للحداثة
لرياح الشمال على رأي طه حسين
مارتن لوثر كينج او مانديلا يعلمنا يعني ايه مواطنة
عشان بقينا عنصريين
يا بتوع نجع حمادي
احب اقولك ... خـــــد

فقدنا ميزاتنا وكسبنا عيوب غيرنا
حلوا عن نفس امي بقى
ام الدنيا
انا اتخنقت
جالي احباااااااااااط
مش قادر اخلق امل جديد
حرااااااام
وعايزينا احنا نبدع
ونشيل عنكوا اللي هببتوه

بجد من قلبي
اه ه ه ه ه ه ه ه ه

الثلاثاء، 29 ديسمبر 2009

أنا .... أنت

انا مكتوب في بطاقتي اللي زي بطاقتك مصري مسيحي
انا مش اهل كتاب
ولا اخوة مسيحيين
تتعامل معايا على اننا شركاء في الوطن
يعني مش زي ما بيقول الدين ولا المتحدثين باسمه
انا ممكن اسيب ديني بس مش ممكن اهرب من انتمائي لوطني
انا وانت اللي متداس علينا بالجزم
بنتعارك والمية بتغرق مركبنا
اوعى تفتكر ان لو المصريين بقوا كلهم مذهب واحد- ولو ان ده شبه مستحيل- ان هيبقى فيه سلام
المشكلة اننا معندناش مشروع قومي نقف حواليه
والعيشة الضنك خلت فيه طاقة عند الناس عايزة تخرج
و كل مجموعة دينية عندهم اجندة وبينفذوها
شعارها شعللها شعللها
اوعى حد بدقن يسوق دماغك ولمؤاخذة يركبك
خلي دماغك فيها فلتر مش "لا تناقش ولا تجادل يا علي"
واقرا التاريخ وشوف المهازل
وافتكر انا.... انت

السبت، 26 ديسمبر 2009

عن الكبائر في مجتمعنا

بوصفنا كلنا بشر خطائون ليس بيننا معصومون من الخطأ من السعودية للفاتيكان وكلنا على ذلك متفقون
وأنا من المعتقدين بتساوي جميع الخطايا فهي ليست بدرجات متفاوتة
لكن طبيعة المجتمعات تجعل بعض الخطايا فيها اكثر شيوعا من البعض الآخر
ومهمة البشر فيها اسهل لتنويم ضميرهم بفرض انهم مؤمنون

ظهر الاسلام ليقضي على اكثر ثلاث خطايا او افات مجتمعية كانت شائعة في شبه الجزيرة العربية في ذلك الوقت وهي الخمر والميسر وتجارة الرقيق
فاكتسب من يرتكب تلك الخطايا بعد ذلك سوء سمعة بالاضافة الى الزنا باعتبار المجتمع الاسلامي في الاساس بدوي والمجتمع المصري مسيحي يعتبر النظرة الشهوانية للمرأة من الزنا
وفي مقابل ذلك تنتشر في مجتمعنا خطايا اخرى عديدة ارتكابها اكثر بساطة مثل الرشوة والاختلاس والغش وخلافه
بعكس العالم الغربي التي تعتبر الخطايا الاخيرة كبائره والاولى صغائره
وياللسخرية لما اسمع واحد بيقولى " الراجل ده استغفر الله العظيم بيروح شارع الهرم بيشرب خمرة ويلعب قمار" وهو بيحط حتة حشيش في الجوزة.

الثلاثاء، 22 ديسمبر 2009

اهو دا اللي صار وادي اللي كان

أحيانا بفكر ان حتى اسمي ضد افكاري
فكرة الاتجاه الى الانتماء للوطن قبل الدين
كان هيجرى ايه لو كانوا سموني اسم تاني غير اندرو
هبقى مسيحي درجة تانية مثلا
الاسم اللي حسسني بالعنصرية من معاملات الناس سواء تمييز بالسلب او الايجاب
طب وكمان ليه ما سمونيش اندراوس الاسم العربي
ولا هي تماحيك فارغة في الغرب

اهو دا اللي صار ، احنا ولاد انهاردة
يوم ما تبقى مصر علمانية يتقال مصر مصرية مش اسلامية ومش اصلها مسيحية والكلام اللي هيودي في داهية ده
يوم ما اشوفش المصريين يتكلموا على اساس الدين
والنكتة الكبيرة انهم بيواجهوا بعض بالمنطق ، والايمان بالدين اصلا خلاف للمنطق
اليوم ده اللي اتمنى اشوفه بسرعة
هروح اغير اسمي

الأربعاء، 9 ديسمبر 2009

سؤال ممكن تشوفه اهبل

ليه كل المصريين اللي بيتكلموا في الجزيرة لسانهم بيتقلب وينطقوا الجيم (j) مش زي ما احنا بننطقها (g)